Pro 18 | MEU | STEP | E haheidaumu tauna ese sibona ena ura e tahuamu; lalo-hadai namodia iboudiai e inai henimu.

Proverbs 18

1 E haheidaumu tauna ese sibona ena ura e tahuamu;
lalo-hadai namodia iboudiai e inai henimu.
2 Kavakava tauna ese lalo-parara se moalelaiamu;
ia sibona ena lalo-hadai igwauraina mo e moalelaiamu.
3 Kara dika e maimu negana ai, heihi-ihirai danu e maimu;
heḡonaḡonalai amo hedadarai e varamu.
4 Tau ta uduna herevadia na ranu dobudia na heheto;
aonega na e lohilohiamu, e aru goadagoadamu.
5 Kara dika tauna ibeiana na dia namo,
bona kara maoromaoro tauna idadaraina danu dia namo.
6 Kavakava tauna bibinana ese heiri-heiri e havaraiamu,
bona uduna ese hedadaba e vaveamu.
7 Kavakava tauna uduna na ia ihabua-tarina,
bona bibinana na ia sibona idoalaina ḡau.
8 Hemaunu tauna ena hereva na aniani mai gaihodia na heheto;
idia na boga lalonai e laomu.
9 Ena ḡaukara ai e lahedomu tauna na
hahebua-tari tauna tadikakana.
10 Iehova ladana na kohoro aukana;
kara maoromaoro tauna na ia lalonai e heau vareaimu bena e maurimu.
11 Taḡa tauna ena taḡa na hanua aukana na heto ia ena,
bona maḡu badana na heto, ia igimana.
12 Tau lalona ena heaḡi ese hahebua-tari e gunalaiamu,
a lalo-manau ese heimodai e gunalaiamu.
13 Tau ta do se kamonai negana ai na e haeremu,
una na ena kavakava bona ena hemarai.
14 Tau ta lalona na gorere ai baine haheauka;
a dara-doko ai daika baine haheauka?
15 Mai darana tauna lalona ese lalo-parara e davariamu,
bona aonega tauna taiana ese lalo-parara e tahuamu.
16 Tau ta ena herahia ḡauna ese ena dala e lailaiamu,
lohia vairadiai e hakaudia vareaimu.
17 E hereva gunamu tauna ena hereva mamina na momokani,
ela bona ta ma bainema, anina baine tahu henia.
18 Mari ese hepapahuahu e hadokodiamu,
bona hahemaoro na siahu taudia padadiai e karaiamu.
19 Tadikakana ese e kahaiamu tauna na hanua aukana na heto,
a heiri-heiri na ruma aukana auridia na heheto.
20 Tau ta uduna huahuana amo e hahehonumu;
bibinana anina amo e hahehonumu.
21 Mase bona mauri na mala siahuna lalonai mimia;
e ura heniamu taudia ese huahuana bae ani.
22 Hahine e adavaiamu tauna ese namo e davariamu,
Iehova ena hahenamo e abiamu.
23 Ogoḡami taudia na e noinoimu,
a taḡa taudia na hereva aukadia amo e haeremu.
24 Haida na e hetura koikoimu,
a hetura korikori tauna ena hedaro-boubou ese tadikaka ena hedaro-boubou e hereaiamu.